$$$ساعة فراق$$$

زائر

رايح اقابلها زى كل مرة .. الفرحة مش سيعانى ، بترقص فى عينيا
و قلبى بيسابق خطاوى رجليا
كلى شوق و لهفة باحلم بلحظة هاسلِّم عليها و تسلِّم عليا

ماشى عمّال ارتِّب فى الكلام و ف الأفكار .. جوايا ليها كلام كتير و اخبار
ماشى و ملامحها قدامى فى السكة .. و حاسس إن حواليا بترفرف الملايكة

شايف كل الناس بتضحك ، و ماحدش مخاصم حد
شايف الفراشات بترقص على خدود الورد

و الطيور بتغنى فرحانة بيا .. و بتسمّعنى افراحها
و اغصان الشجر بتلعب ويّا نسيم المغربية .. عمّال يمرجحها

حاسس إن الكون دا كله بيعزف سيمفونية .. اسمها اسعد مخلوق ع الأرض

اروح ... و الاقيها مستنيّة
فى نفس المكان ، اجرى عليها و اسلِّم بعنيا قبل ايديا ... و بكل اللهفة اللى بيا

أسألها ألف سؤال عشان اطمن بالى
لكن مالها كده ، ليه ساكتة و متغيّرة ؟ ... ليه مش سألتنى مالى ؟

فيها حاجة مش هيّه

ليه ساعة ما سلِّمت عليها حسيت ايديها بردانة
و الابتسامة على شفايفها شايفها دبلانة
فين فرحتها بلقانا ؟

فين فى عينيها البريق .. لما كانت بتقابلنى ؟
ليه شايفُه كأنه شىء .. حاسُـه حـ يقتــلنى ؟

ماتت الفرحة جوايا و اتولد خوفى

قلتلها اتكلِّمى .. قالت : خلاص .. مشوارنا انتهى .. و كل شىء قسمة و نصيب
م النهاردة مش هشوفك ، مش هقابلك .. م النهاردة عنك للأبد هاغيب

قلتلها : ليه ؟ .. قالت : اسأل قدرنا .. اسأل زمنّا

و قبلهم اسأل ظروفـى

تاية ، حزين ، متحيّر .. بصيت جوّه عينــيها
لقيــت الحيــرة أكبــر .. و الحزن ساكن فيها

و الدمعة مدّاريّة .. من خوفها عليا

قبل ما تنزل على خدودها .. فى عينيها بتتكسّر
وقفت مش عارف عليا و للا عليها أتحصّر

و فضلت واقف .. حاسس إيه ؟ .. مش عارف .. أعمل إيه ؟ .. مش عارف
اتكلِّم ؟ .. أسكت ؟ .. أحضنها ؟ ... أقرّب ؟ .. أبعد ؟ .. أخنقها ؟ ... أبكى ؟ .. اصرخ ؟ .. ألومها؟
أقول كلام يجرحها و يألمها ؟ ... أحايلها ؟ .. أشكيلها ؟ .. أفضل واقف ، و للا امشى و اسيبها ؟

عقلى واقف .. قلبى واقف .. و انا واقف .. وسط ضلمة و مش شايف

ما بين مليون سؤال .. و ما بين ألف انفعال ... غرقان فى دوّامة
يادوب لحظات معدودة بس عدت سنين .. ما فقتش غير على صوتها بتقولى : مع السلامة

حسيت ان روحى سابتنى .. و انى خلاص باموت
و الاقى الدنيا وقفت وكل شىء حواليا ما لهش صوت
غريبة كانت بتغنى من دقايق .. و كأنها حست بحزنى و انا بفارق
غِرِقِتْ فى السكوت

حزينة كل الوشوش
روَّحت الطيور و نامت فى العشوش

و الفراشات سابت الورود
و راحت تدور .. حوالين نور .. حـ يقتلها و مش هيخليها للورد تعود

حتى الشمس خلاص بتلملم ستايرها و مروّحة
و سايبة الليل على الدنيا يفرد الأجنحة
حتى السحاب حسيت كأنه بيبكى عليا و عيونه متجرّحة

و دموعه كأنها بساط بلون الدم على السما مفروش

كل شىء كان جى معايا سعيد .. زى حبيبتى رجع و سابنى و ودعنى و راح لبعيد

و بسأل نفسى ياترى ممكن يرجع .. النهار بعد ما ودّع ؟ .. ياترى الشمس من تانى هتطلع ؟
و الفجر من تانى هيشقشق ؟ ... و العصافير اللى نامت هتصحى و تزقزق ؟
و للا لاءه ... ايوة .. لاءه .... مفيش حاجة هترجع

و م النهاردة مش جى العيد

مفيش أمل و لا شمس .. مفيش بكرة و لا أمس .. كل اللى هاحسّو بس ... طعم ساعة الفراق
مفيش ابتسام و لا همس .. مفيش غنا و لا رقص .. كل اللى انا بيه هاحس .. وجع ساعة الفراق

زائر

حسيت ان روحى سابتنى .. و انى خلاص باموت
و الاقى الدنيا وقفت وكل شىء حواليا ما لهش صوت
غريبة كانت بتغنى من دقايق .. و كأنها حست بحزنى و انا بفارق
غِرِقِتْ فى السكوت

تسلم ايدك ياسبوت

المدير العام عدد الرسائل : 7930

مفيش أمل و لا شمس .. مفيش بكرة و لا أمس .. كل اللى هاحسّو بس ... طعم ساعة الفراق
مفيش ابتسام و لا همس .. مفيش غنا و لا رقص .. كل اللى انا بيه هاحس .. وجع ساعة الفراق

مفيش اجمل من كده
نسلم ايدك يا احمد

زائر

وايدك يامهند
ونورت المنتدى ياميدو ياعسل
وشكرا على المتابعه والاضافه الجميله جزاك الله خيرا

زائر

مفيش أمل و لا شمس .. مفيش بكرة و لا أمس .. كل اللى هاحسّو بس ... طعم ساعة الفراق
مفيش ابتسام و لا همس .. مفيش غنا و لا رقص .. كل اللى انا بيه هاحس .. وجع ساعة الفراق

تسلم ايدك بجد تحفه

تحياتى لك ولك منى كل احترام وتقدير

زائر

بجد متشكرا على مرؤئك الجميل وعلى احترامك

زائر

تسلم ايديك

زائر

وايدك ياقمر